По многу шпекулации и непотврдени вести, конечно се потврди дека Мерцедес потпишаа договор со Финецот Валтери Ботас од Вилијамс, кои испразнетото место ќе го пополнат со Фелипе Маса. Мерцедес го „згрижија“ и Паскал Верлајн во тимот на Заубер.
Ботас ќе треба да го замени пензионираниот Ф1 шампион Нико Розберг и ќе има вистински предизвик да биде колега на трикратниот светски шампион Луис Хамилтон во 2017 година. Тој помина четири сезони во Вилијамс каде што се стекна со репутација на брз и квалитетен возач.
Вилијамс во исто време потврдија дека бразилскиот ветеран Маса ќе вози барем уште една година заедно со канадскиот тинејџер Ленс Строл.
„Валтери доби голема шанса во текот на зимата и му посакувам се најдобро во Мерцедес. Јас пак, добив шанса да им помогнам на Вилијамс во новата сезона и мислам дека тоа е исправна одлука“, вели Маса.
Во исто време, се реши иднината и на јуниорскиот возач на Мерцедес, Германецот Паскал Верлајн, кој ќе вози за тимот на Заубер покрај Швеѓанецот Маркус Ериксон. 22-годишниот Верлајн минатата година дебитираше во тимот на Мејнор.