Поранешниот лидер на тимот на Ферари, Лука ди Монтеѕемоло, од сегашна перспектива признава дека воведувањето на хибридните 1.6 литарски В6 турбо-мотори во Формула 1 „голема грешка“. Нивото на перформанси на Скудерија е далеку под очекувањата, со само три победи (сите во 2015) во трите сезони. Иронично, Ферари беше поддржувач на менување на старите мотори.
Монтеѕемоло вели дека претседателот на Мерцедес, Ники Лауда, му признал дека германскиот тим почнал да работи на својот доминантен мотор во 2007 година, далеку пред воведувањето на новата ера.
„Лауда неодамна ми призна дека Мерцедес работеа на нивниот хибриден мотор од 2007 и дека затоа беа толку упорни во преговорите за воведување на В6 мотори од 2014. Да, тоа беше моја грешка. Но, сметав дека не можам да го поставам Ферари во позиција во која нема да има развој. Ферари кој се плаши не беше мојот Ферари“, изјави Монтеѕемоло во интервју за „Ла република“.
Во 2014 година, на почетокот на новата хибридна ера, „Сребрената стрела“ на Мерцедес беше супер-брза од првиот ден, додека тимовите со мотори на Ферари и Рено (четирикратните шампиони Ред Бул посебно) имаа големи маки прво со стабилноста на моторот, а потоа и со брзината.
„Мерцедес, Рено и Ферари пет години знаеја какви мотори треба да направат. Мерцедес едноставно заврши подобра работа. Тоа е мотоспортот“, изјави тогаш Жан Тод, претседателот на ФИА.
Монтеѕемоло вели дека во тој момент ја загубил довербата во „новата“ Формула 1.
„ФИА заборавија дека луѓето гледаат Формула 1 поради возбудата. Никој не гледа тркање поради енергетска ефикасност, ве молам! Исто така, не смееме да го допреме моторот? Каков е тоа спорт? Никој не сака да гледа возач како штеди гуми или гориво. Сакаат да го гледаат како оди до максимум. Да, ова е спорт, но исто така е и големо шоу“, вели Монтеѕемоло.