Тимот на Мерцедес потврди дека Англичанецот Џејмс Елисон е нивниот нов технички директор по заминувањето на Педи Лоув. Лоув, чие заминување се очекуваше повеќе месеци, се приклучува на тимот на Вилијамс, но ова уште не е официјално потврдено.
Елисон беше технички директор на Ферари до крајот на минатата година, но си замина од тимот од Маранело на крајот на јули по трагичната смрт на неговата сопруга. Тој ќе почне да работи во Мерцедес во март и ќе биде на новата позиција технички директор - ќе одговара директно на шефот Тото Волф.
„Возбуден сум што повторно се враќам на работа по долгата пауза. Голема привилегија е да добиеш место во тим кој имаше спектакуларни успеси последните три години. Очекувам тимот да го направиме уште посилен“, вели Елисон.
Со ангажирањето на Елисон, Мерцедес покажуваат дека не планираат да застанат со доминацијата.
„Пресреќен сум што можеме да му посакаме добредојде на Џејмс во Мерцедес. Нашиот технички тим е многу квалитетен со три титули во низа, така што беше тешко да се најде човек кој може да ја засили оваа група. Џејмс е совршениот за таа работа“, вели Волф.