Побрзи, повозбудливи и, секако, поинакви болиди. Од новата ера на Формула 1 се очекува многу пред стартот на зимското тестирање во Барселона денеска.
Иако тестирањето никогаш не е јасен показател што завршиле тимовите во текот на зимските месеци, оваа година со „стиснат“ календар со само осум дена тестирање, и тоа сите во Барселона и новите аеродинамички правила, може да имаме возбудливи и непредвидливи осум дена во Каталонија.
Покрај возбудата кај тимовите и возачите, на тестирањето посебно внимание ќе покажат и шефовите на спортот, посебно по ветувањето дека со новите аеродинамички правила и пошироките гуми ќе имаме болиди кои ќе се четири-пет секунди пборзи по круг.
Болидите не се само побрзи и со поагресивен изглед - според шефот на Ред Бул, Кристијан Хорнер, тие ќе ги одвојат „момчињата од мажите“.
„Болидите ќе бидат пофизички напорни, потешки... Ова е враќање на времето кога болидите можеа да ги возат вистински мажи“, вели Хорнер.
По колапсот на тимот на Мејнор, сезоната ја започнуваат само 10 тимови. Шпекулациите се дека Ред Бул имаат болид кој може да ја предизвика доминацијата на Мерцедес од последните три години. Колку тоа е вистина ќе видиме многу бргу.