Луис Хамилтон и Мерцедес не се готови. Тоа го покажаа на фантастичната трка на шпанското ГП покрај Барселона, откако по драматична трка што ја помина во битка со Себастијан Фетел во Ферари, стигна до победата за да се доближи на само шест поени до водството на Фетел.
Хамилтон ја стартуваше трката од пол-позицијата, но веднаш беше поминат од Фетел и возачот на Ферари ја имаше предноста сѐ до средината на трката, кога двајцата возачи тргнаа со различна стратегија. Хамилтон реши да оди на „меки“ гуми, додека Фетел смени „средни“ гуми, и на крајот возачот на Мерцедес успеа да го помине Фетел и да ја задржи предноста до финишот на трката.
„Момци, што да ви кажам?! Фантастична работа овој викенд, многу ви благодарам. Стратегијата беше совршена“, изјави Хамилтон веднаш по трката.
Подиумот го комплетираше Даниел Рикијардо во Ред бул, откако Кими Раиконен се судри на првата кривина со Макс Ферстапен и двајцата ја завршија трката таму, додека моторот на победникот од Сочи, Валтери Ботас, не издржа цела трка.