Победникот на шпанското ГП, Луис Хамилтон, вели дека забележал дека неговиот главен ривал за Ф1-титулата, Себастијан Фетел, бил лут по поразот во Барселона.
Нивната борба во текот на целата трка вклучуваше фантастичен старт на Фетел за да го помине Хамилтон на стартот, контакт во првата кривина откако Фетел излезе од боксот покрај ривалот и најважно, различна стратегија на Мерцедес, која придонесе Хамилтон да го помине Фетел во финишот од трката.
„Можев да почувствувам дека е лут, и тоа го призна и самиот. Тој имаше одлична трка, така што разбирам како се чувствува. Никогаш нема да се задоволиме со второто место и би бил загрижен ако тој се задоволи со поразот“, вели Хамилтон.
Прашан дали борбата за титулата со Фетел, кој останува шест поени пред него, ќе влијае на нивните досегашни солидни односи, Хамилтон немаше одговор.
„Не знам, тешко е да се процени. Имавме тесна битка и ако трката завршеше поинаку, и јас ќе се чувствував поинаку. Знаеме какво е тркањето. Да ме удреше на првата кривина и да не ја завршев тркатам немаше да му честитам, тоа е сигурно. Сепак, имавме добра битка и предизвикот секогаш е добар. Тој покажа почит и остана ист и по крајот на трката“, вели Хамилтон.