Адријан Њуи полека ја зголемува својата работа со Формула 1 тимот на Ред бул во последните недели за да помогне да се „сврти“ сезоната за поранешните четирикратни шампиони.
По зимското тестирање, се веруваше дека Ред бул ќе биде најсериозната закана за доминацијата на Мерцедес оваа сезона, но поради комбинација на проблеми со воздушниот тунел и слабо завршената работа на аеродинамичкиот тим, неговиот болид едноставно нема доволно потисна сила на патеките, а, исто така, се познава и дефицитот на моторот на Рено.
Тимот имаше големи подобрувања на болидот за Шпанското ГП, со кои се намали разликата на врвот, особено во квалификациите, но овој чекор не беше доволен за да се разбие доминацијата на Ферари и на Мерцедес.
Њуи подолго време не е целосно вклучен во дизајнирањето на болидите на Ред бул, работејќи на други проекти, како едриличарскиот потфат за тим на Американскиот куп, како и хиперавтомобилот во партнерството со Астон Мартин.
Но, сега, шефот на тимот, Кристијан Хорнер, вели дека влијанието на дизајнерот полека се зголемува поради слабата конкурентност, откако самиот Њуи призна дека РБ13-болидот не бил „негово дело“.
„Адријан дојде во Барселона и внимателно слушаше што кажуваа возачите. Тоа наликуваше на посета на доктор. Тој сакаше да ги сфати проблемите на возачите и верувам дека ќе работи во еволуција на нашиот болид. Во текот на зимата, тој беше 50% присутен во заднина, но по тестирањето во Барселона повеќе ќе се вклучи“, вели шефот на тимот, Кристијан Хорнер.
Њуи сега има доволно време да му посвети на Ф1-тимот, бидејќи претходните обврски на проектот со Астон Мартин се завршени.
„Циклусот со Астон Мартин намалува, бидејќи неговите делови се веќе проектирани и сега работи дизајнерското студио. Засега неговите напори ќе бидат насочени кон Формула 1“, додава Хорнер.