Шефот на Мерцедес, Тото Волф, верува дека силниот старт на Ферари оваа сезона е резултат на тоа што италијанскиот тим потрши 16 недели повеќе на работата на својот болид. Во 2016 година, Ред бул му беше главен конкурент на Мерцедес, додека Ферари беше далеку на третото место и Австриецот верува дека поради тоа, тој се фокусирал на работата на СФ70-Х болидот.
„Од тоа што го знам јас, Ферари почна со развојот на болидот многу рано - во декември 2015. Ние стартувавме во март 2016 година. Дотогаш Ферари имаше 50 отсто од ресурсите на новиот болид, така што тој сега има предност од 16 недели, време во кое можете да најдете доволно потисна сила за предност од четири или пет десетинки од секундата“, вели Волф во интервју за германскиот весник „Зидојче цајтунг“.
Себастијан Фетел направи предност од 25 поени во пласманот на возачи пред Луис Хамилтон, откако триумфираше на Монако ГП трката, додека Скудерија има предност од 17 поени во пласманот на конструктори пред седмата трка од сезоната во Канада, следниот викенд.