Даниел Рикијардо ја оствари првата победа за Ред бул во 2017 година. Ленс Строл стана најмладиот возач на подиумот со третото место. Фернандо Алонсо и Мекларен-Хонда ги освоија првите поени оваа сезона. Во Форс Индија и во Торо Росо, јасно станува дека има конфликт меѓу возачите... Меѓутоа, сѐ ова паѓа во сенка на случката која предизвика бура реакции и по која ништо нема да биде исто во досега „џентлменската“ борба меѓу Себастијан Фетел и Луис Хамилтон.
Сѐ започна при второто излегување на безбедносното возило на патеката. Пред вториот рестарт на трката, Хамилтон неочекувано забави на излезот на 15-тата кривина и Фетел удри во него, добивајќи оштетено предно крило и јавувајќи се преку радиото: „Тој се обидуваше да ме тестира под сопирачки“.
Фетел гестикулираше со рацете, по што дојде до страната на Хамилтон и сврте кон него. „Тој дојде до мене и само ме удри!“, реагираше Хамилтон. Фетел го смени крилото додека беше црвеното знаме во 24-тиот круг. Тој ја доби казната во 32. круг, по што се прашуваше: „Кога возев опасно?“
Иронично, откако ја отслужи казната, тој се врати пред Хамилтон, кој мораше да влезе во боксот за да се поправи неговиот потпирач за главата.