Моментално двата најдобри тима во Формула 1, Мерцедес и Ферари, не се заинтересирани да го снабдуваат Мекларен со свои мотори. На десет трки оваа сезона, британскиот тим освои само два бода со деветтото место на Фернандо Алонсо во Азербејџан, но имаше голем број казни поради честите промени на моторот. Директорот на Мекларен, Зек Браун, смета дека Мерцедес и Ферари немаат намера да му дадат мотори затоа што се плашат.
„Ние сме одличен тим, Мекларен покажа способност да освојува трки и шампионати. Но некои други тимови уживаат да нѐ гледаат тука, каде што се наоѓаме сега. Се плашат затоа што би им биле закана, а тој страв е разбирлив“, изјави Браун.
На крајот од сезоната, Мекларен ќе ѝ стави крај на соработката со Хонда и на тој начин ќе се ослободи од агонијата и од годинашниот дебакл. Доколку Мерцедес и Ферари одбијат потенцијална соработка, тогаш друга опција за Мекларен ќе биде францускиот Рено.