Шефот на Ред бул, Кристијан Хорнер, признава дека бил изненаден од тактиката на Мерцедес на Унгарското ГП и од промената на позициите на возачите.
Побрзиот Луис Хамилтон беше „заглавен“ зад Валтери Ботас додека ѝ се приближуваа на двојката на Ферари, по што тимот му порача на Ботас да го пушти Хамилтон. И Британецот му ја врати позицијата кога веќе не можеше да се бори со Кими Раиконен. Иако видливо побрз, Хамилтон не успеа да го помине Раиконен, по што го искористи ветувањето и му дозволи на Ботас да го помине во последната кривика од последниот круг.
По трката, Хамилтон призна дека не му се допаѓало пропуштањето, а шефот на тимот, Тото Волф, изјави дека тоа било најтешката одлука што ја донел во последните пет години. Хорнер беше изненаден.
„Да, бев изненаден, иако ќе беше сурово кон Валтери, бидејќи, во спротивно, ќе му дадеа порака дека е во аут во трката за титулата. Импресиониран сум што Луис го врати местото, бидејќи така му предаде повеќе поени на главниот ривал. На крајот ќе се работи за тие двајца, Фетел и Хамилтон. Позицијата на Ферари кон Кими е појасна“, вели Хорнер.
Ред бул во минатото користеше тимски наредби кои не беа послушани, особено инцидентот на Малезиското ГП во 2013, кога Себастијан Фетел одби да ја послуша наредбата и го помина Марк Вебер за победа. Во 2015 година, тие имаа слична тактика во Монако, обезбедувајќи го четвртото и петтото место.
„Тоа во Монако беше слично, но малку различно бидејќи немавме возач кој се бори за титулата. Хамилтон е нивни прв возач и во одреден момент мораш да одиш само со еден возач“, додава Хорнер.