Шефот на Ред бул, Кристијан Хорнер, верува дека несреќите на Макс Ферстапен во првиот дел од сезоната ќе бидат само мотивација повеќе за младиот Холанѓанец во вториот дел од сезоната. Ферстапен освои само 67 поени во споредба со 117-те на колегата Даниел Рикијардо и се откажа од пет од првите 11 трки.
Три откажувања беа директно поврзани со постојаноста на болидот - сопирачките во Бахреин, акумулаторот во Канада и моторот во Азербејџан, додека поради судири во првиот круг, кои не беа негова вина, се откажа во Шпанија и во Австрија.
Хорнер вели дека се работи за недостиг на среќа и верува дека Ферстапен ќе биде многу посилен во вториот дел од сезоната.
„Кога го промовиравме РБ13-болидот, постоеше дебата дали треба да го наречеме 12а или да го користиме несреќниот број 13. Затоа решивме да одиме со слоганот ’13 е среќен за некои’. Досега среќен е за Даниел, но не и за Макс. Сепак, тој продолжува со растот и незгодите што ми се случија на четири последователни трки пред Силверстоун, навистина нѐ налутија. Тој беше втор во Монтреал и во одлични позиции во Азербејџан и во Австрија. Фрустрирачки е за него, но досега добро се справува со работите и мислам дека како еден 19-годишник, има неверојатно искуство. Уште е млад, но верувајте, ќе биде многу, многу посилен. Во Спа очекуваме многу белгиски и холандски фанови за Макс и верувам дека и тој едвај ги чека“, вели Хорнер.