Мото клубот „Ендуро Тим Водно“ од Скопје втора година по ред ќе ја претставува Македонија во меѓународни рамки. Во новата сезона во БМУ европските шампионати екипата ќе настапи со четворица возачи во две натпреварувања, за разлика од минатата кога настапи со двајца во едно натпреварување.
Во брзинскиот шампионат ќе возат Христијан Бузалковски и Игор Спиров, Ќе настапат во категориите до 125 и 600 кубни сантиметри – Бузалковски, односно до 1.000 кубни сантиметри – Спиров.
Во мото-крос шампионатот ќе возат Христијан Станковиќ и Виктор Караколев, двајцата во категоријата до 250 кубни сантиметри, во класата MX2.
- Идејата е оваа година попрофесионално да се претставиме на меѓународната сцена. Набавивме два нови професионални мотоцикли. Се надеваме дека оваа сезона ќе биде многу подобра од лани. Лани имавме голем успех, во двете класи во кои што возеа нашите натпреварувачи имавме две вицетитули. Оваа година се надеваме барем на една шампионска, вели Владимир Димов, претседател на тимот.
Во брзинскиот шампионат ќе се возат 13 трки во Грција, Романија и Бугарија, а можеби и во Македонија. Во мото-крос шампионатот ќе се возат седум трки.