Шефот на Ферари во Формула 1, Матија Бинотo, го прекори својот пилот, Шарл Леклер. Причината за ова беа коментарите на младиот пилот по завршувањето на Големата награда на Сингапур, каде започна од пол-позиција, но заврши на третото место.
Дваесет и едно годишниот пилот од Кнежеството беше незадоволен од фактот дека неговиот тимски колега Себастијан Фетел не се придржуваше целосно на тимската стратегија. Проблемот долго време се дебатираше пред сите на тимското радио и така стана достапен за сите навивачи.
– Мислам дека има некои работи што не треба да се кажуваат на радио, затоа што на крајот, тие нема да го променат нашето размислување, туку едноставно ќе ја зголемат возбудата на самата трка. Постојат моменти кога мора да кажете нешто и има моменти кога мора да молчите. Мислам дека во овој поглед, тој (Леклер – н.з.) знае дека има многу да учи. Фактот дека тој подоцна се извини, покажа дека тој го сфатил тоа, изјави Биното.