Формула 1 тимот на Лотус го претстави болидот Е20 кој ќе го вози повратникот Кими Раиконен во новата сезона. Е20 ќе го има пробното возење денеска во Херез, а во новата сезона Раиконен за партнер ќе го има Роман Грожан.
Според Ерик Булиер, новиот болид има повеќе суптилни иновации. Издувниот систем е редизајниран, а со ревизијата на предната и задната суспензија, се очекува да се добие повеќе аеродинамичност. Тимот сега има нови спонзори на самиот болид, Rexona и Clear.
-Се надевам дека многу ќе научам од Кими. Сите очекуваме многу оваа сезона. Треба заедно да работиме, за да го однесеме тимот напред. Тоа е нашата главна цел, изјави Грожан.
Како и за Раиконен, овогодинешната сезона е камбек сезона и за Грожан кој се враќа по лошата деби сезона во Рено кога го имаше Фернандо Алонсо за партнер. Новата сезона во Формула 1 ќе започне на 18 март.
