Катерхам Ф1 тимот отпушти повеќе од 40 вработени откако новите сопственици решија да ги намалат трошоците. Помеѓу тие што си заминуваат се заменикот технички директор Џоди Егингтон и шефот за операција на трки, Гери Хјуз.
Малезискиот бизнисмен Тони Фернандес овој месец го продаде тимот на инвеститори од Швајцарија и Блискиот Исток, и сега тимот ќе биде предводен од поранешниот холандски Ф1 возач Кристијан Алберс и поранешниот шеф на Мидланд, Спајкер и ХРТ, Колин Колс.
Пред преземањето Катерхам имаше околу 350 вработени, и се верува дека заминуваат тие со најголемите плати. Американскиот возач Александер Роси во средата исто така објави дека си заминува од тимовите на Катерхам во Ф1 (каде што беше резерва) и од ГП2 серијата. Шпекулациите велат дека е несигурно местото на Јапонецот Камуи Кобајаши, бидејќи тимот ќе побара возач кој може да донесе повеќе пари.