Даниел Рикардо од Австралија е победник на трката во Формула 1 шампионатот за Големата награда на Унгарија.
Возачот на Ред Бул во супер интересната трка на патеката „Хунгаро ринг“ до својата втора победа сезонава и втора во кариерата стигна на два круга пред крајот откако ги мина Луис Хамилтон и Фернандо Алонсо.
За австралискиот возач ова е петти пат сезонава да се искачува на пиедесталон на кој денеска крај него место имаше и за Фернандо Алонсо од Ферари, како и Британецот Луис Хамилтон на Мерцедес, кој до третото место стигна иако трката ја започна како последен од боксот.
Иако стартуваше прв, Германецот Нико Розберг на крајот мораше да се задоволи со четвртото место, но тој и натаму останува водечки во генералниот поредок сега со 202 бода. Неговиот клупски колега Луис Хамилтон е втор со 191, а денешниот победник Рикардо сега има 131 бод.
Во конкуренција на конструктори Мерцедес е убедливо прв со 393 бодови, пред Ред Бул со 219 и Ферари со 142 бодови.
Во Ф1 шампионатот следува речиси едномесечна пауза, а следната трка ќе се вози на 28 август и тоа за големата награда на Белгија.