Извршниот директор на Мерцедес, Тото Волф, вели дека колегите и ривали за титулата, Луис Хамилтон и Нико Розберг, се „како непријатели“ во борбата оваа сезона.
На шест трки пред крајот, започнувајќи со Сингапур ГП трката овој викенд, само 22 поена ги делат двајцата возачи, чии односи деградираа во текот на сезоната, пред целосен крах на Белгиското ГП, кога Розберг се удри во Хамилтон. Две недели подоцна Хамилтон врати со победа пред Розберг во Монца.
Волф, кој по инцидентите ги предупреди возачите дека можат да бидат сменети, сега признава дека односите се во „распад“.
„Ситуацијата се смени од речиси пријателска атмосфера на почетокот на сезоната до многу инциденти, во кои тие возат како непријатели. Но, ова исто така е процес на учење. Двајцата цел живот го подготвуваат за борба за тој трофеј во Ф1 и сега се во ист болид. Еден од нив ќе успее, другиот нема“, објаснува Волф.
Австриецот не сакаше да ги коментира тврдењата дека Розберг, конечно, ја покажа „безмилосната“ страна на својот карактер на квалификациите во Монако и на трката во Белгија.
„Има 22 момци и сите се безмилосни. Тие знаат што е потребно за да се победи. Нико секогаш бил таков. Не знам откаде дојде перцепцијата дека тој е фино момче“, додава Волф.
За Хамилтон, кој повторно има сезона со многу добри, но и лоши моменти, Волф смета дека нема потреба за никаква промена.
„Тој си најде свој начин и се развива екстремно, така што не му е потребен голем менаџмент. Само треба да сфатиме каква работна атмосфера треба да му дадеме за да функционира најдобро. Нема смисла сега да се обидувам да ги менуваме неговата личност и да му кажеме дека треба да се однесува како Ники Лауда или Фернандо Алонсо. На Луис му е потребно и кучето што го носи на трки, и тој Лос Анџелес пристап. Тоа е неговата личност и го прави да функционира добро“, вели Волф.