Макс Ферстапен ќе го има својот прв официјален Ф1 викенд на Јапонското ГП откако тимот на Торо Росо потврди дека ќе вози на првиот слободен тренинг.
Холанѓанецот, кој ќе стане најмладиот Ф1 возач во историјата кога ќе вози за италијанскиот тим во 2015 година, чекаше таканаречена „супер-лиценца“ и откако се потврди тоа, тимот реши да му даде прва шанса.
„Едвај чекам да бидам дел од Ф1 викенд првпат во кариерата. Тоа е одлична подготовка за следната година и нешто што не можев да го замислам пред неколку месеци. Ќе добијам драгоцено искуство, ќе поминам повеќе време во болидот и иако сум бил на симулаторот, ништо не е како кога ќе влезеш во вистински болид“, вели Ферстапен.
Холанѓанецот, кој ќе наполни 17 години во вторник исто така е најмладиот возач кој учествувал на Ф1 тренинг. Тој вели дека бил „скениран“ од глава до петици пред дебито.
„Во Финска го тестираа моето физичко здравје и за среќа сé е добро. Тие ме скенираа од глава до петици и медицинскиот тим беше задоволен од мојата подготвеност. Досега тестирав на симулаторот во центарот на Ред Бул двапати, но речиси невозможно е да се креираат силите на вистински болид“, додава Ферстапен, кој инаку е син на поранешниот Ф1 возач Јос Ферстапен.