Себастијан Фетел не очекува да добие победничко Ферари во 2015. По четирите доминантни титули, Германецот имаше проблематична 2014 поради проблемите на Ред Бул со моторот на Рено и беше совладан од новиот колега Даниел Рикијардо.
„Тоа не беше одлука донесена преку ноќ. По разочарувачките резултати во првиот дел од сезоната постоеше можност да се замине од Ред Бул. Тоа донесе до преговори со Ферари и интересот беше тука. Мислам дека тајмингот беше добар за сите“, вели Фетел откривајќи дека во неговиот договор сепак постоела клаузула за перформанси.
Тој доаѓа во Ферари, најславното име во спортот, во тежок период и го заменува Фернандо Алонсо, еден од најценетите Ф1 возачи по пет години без титула.
„Не се залажувам дека следната година ќе можеме да се бориме со Мерцедес. Свесен сум дека во Ферари имаме голема работа заз која е потребно време, посебно кога Мерцедес има таква предност. Секоја промена е чекор во непознатото и затоа ризик. Но, размислував многу пред да донесам ваква одлука. Сигурен сум дека ќе бидам успешен, но на почеток треба да докажам дека ја направив вистинската одлука, за мене и за Ферари“, вели Фетел во интервју за германскиот весник „Ди Велт“.