Менаџерот на Михаел Шумахер, Сабине Кем, побара „реални очекувања“ од дебито на 16-годишниот син на легендата Мик во Формула 4 шампионатот. Мик Шумахер ја почна својата кариера во малите формула-серии со тест на патеката Ошерслебен во Германија, каде што на 25 и на 26 април почнува шампионатот.
„Мојата порака е да се биде реален со очекувањата. Ова е прва година на Мик во формула-серијата и тој мора да научи многу нови работи и нови искуства, бидејќи разликата помеѓу картингот и формула-болидите е огромна. Дајте му време, не очекувајте премногу и одете чекор по чекор“, изјави Кем.
Мик Шумахер се приклучи на холандскиот тим „Ван Амерсфорт рејсинг“ во серијата од осум трки, Германска Формула 4. Се верува дека над 100 новинари побарале акредитации за тест-сесијата.