По дефинирањето на изгледот на групите за новата сезона во Лигата на шампионите, Европската ракометна федерација ги објави и паричните награди кои ќе ги добијат клубовите за учество во најсилното европско натпреварување.
Во машка конкуренција за учесниците во групната фаза наградата е 60.000 евра, додека победниците во групите ќе добијат дополнителни 30.000 евра. Клубовите кои ќе обезбедат пласман во осминафиналето ќе заработат дополнителни 30 илјади евра, додека истата сума ќе им биде искреширана и на тимовите кои ќе се најдат во Топ 8. Победникот во Лигата на шампионите 2015/2016 во Келн не само што ќе ја има привилегијата да го крене трофејот, туку ќе заработи и пола милион евра. Вицешампионот ќе добие награда од 250 ијлади, за треторангираниот наградата е 150 илјади, додека четвртиот тим во елитата ќе освои 100 илјади евра.
Паричните награди во женска конкуренција се со помал износ, односно за учесниците во групната фаза наградата е 10.000 евра. Тимовите кои ќе обезбедат пласман во главната фаза ќе заработат 20.000 евра. Четвртфиналистите ги чека износ од 25 илјади евра, додека четирите екипи кои ќе се пласираат на Ф4 во Будимпешта имаат 50 илјади евра.
Во зависност од остварените приходи во текот на сезоната, не е исклучена можноста од дополнителни бонуси за екипите што ќе се најдат на завршниците во Келн и Будимпешта.