Најдобриот тенисер во светот, Новак Ѓоковиќ, продолжува со сигурните игри на неофицијалното светско тениско првенство, во Вимблдон. Србинот лесно, на трипати со по 6:3 во сетови, беше убедлив против Бернард Томиќ од Австралија и се пласираше во осминафиналето, каде за противник ќе го има Кевин Андерсон од Јужна Африка. По влезот во осминафиналето Ѓоковиќ го очекува дводневен одмор бидејќи денеска нема не игра, а утре е слободен ден.
Популарниот Ноле вели дека атакува на трофејот, но мора да биде внимателен.
- Засега се оди според планот. Имам контрола на ударите од основната линија, а и добро сервирам. Сепак, морам да бидам сè подобар и подобар бидејќи како се ближи крајот на турнирот, така и противниците се подобри. Можеби делува дека лесно поминувам бидејќи сите мечеви ги добив со по 3:0, но не е така. Задоволен сум прикажаното по првата недела, рече Ѓоковиќ, кој по мечот доби понуда да се потпише на вештачката нога на еден свој обожавател.