Потписот на договорот на Мите Стоилов, последното најавено засилување на скопскиот суперлигаш е единственото нешто што во моментов го чека раководството на клубот за да биде затворена и таа дилема кога е во прашање играчкиот кадар. Сепак, со тоа нема да биде комплетен изгледот на тимот.
- Ростерот е 80% готов. Со Мите Стоилов имаме устен договор, кој само треба да добие писмена потврда, која верувам дека ќе се случи деновиве.
Ренато Вугринец ќе биде дел од Работнички на почетокот од подготовките, но дали ќе падне и договор за соработка, тоа ќе знаеме откако ќе дојде во Скопје. Со исклучок на тоа прашање верувам дека сите дилеми околу играчкиот кадар ќе бидат решени до почетокот на подготовките, потврдува претседателот на клубот, Ристо Чокрев.
Собир на 5-ти август
Новата приказна во која влегува стариот и добро познат скопски суперлигаш ќе почне на 5 август, за кога е закажан почетокот на подготовките за претстојната сезона. Екипата, која со сите активности летово треба да претставува вистинско освежување и да ја засили конкуренцијата на домашна сцена, до стартот треба да го има комплетниот изглед на тимот, барем за првиот дел од сезоната.
-Подготовките на Работнички ќе почнат на 5 август на игралиштето на ФК Работнички каде ќе бидеме два-три дена. Потоа се заминува на десетдневни базични подготовки во Маврово. Една седмица ќе бидеме во Скопје, а потоа во периодот од 25 до 30 август во преговори сме за учество на меѓународен турнир надвор од Македонија. Во зависност од тоа кога ќе стартува домашното првенство, ќе го планираме понатамошниот изглед на подготовките, како и евентуалните пријателски натпревари кои би ги одиграле, вели Чокрев.
Освен финалниот изглед на играчкиот кадар се чека клубот и официјално да го претстави стручниот штаб, кој ќе ја предводи екипата во новата сезона, што најверојатно ќе се случи непосредно пред првата прозивка.