Женската младинска ракометна репрезентација на Македонија (до 19 години) го освои 15-то место на Европското првенство што се игра во Валенсија, Шпанија.
Во дуелот за избегнување на последната позиција Македонија ја победи Литванија со 29:27 (13:17). Ова беше втора победа на нашите ракометарки на шампионатот и повторно беше совладана Литванија како и во дуелот од првото коло од групата.
Избраничките на селекторот Симе Симевски на полувремето имаа негатива од четири голови (13:17), но во вториот дел беа подобар ривал и го добија вториот дел со 16:10 за конечни 29:27. Во македонската репрезентација по шест голови постигнаа Теодора Керамитчиева, Наташа Нолевска и Ангела Тодоровска, додека признанието за најдобра во нашиот состав и припадна на голманката Нина Ладева.
Утре во финалето ќе играат Русија и Данска, а во дуелот за бронзениот медал Унгарија и Шведска.