Македонскиот шампион ЖРК Вардар новата сезона во Лигата на шампионите ќе ја отвори пред домашната публика на 17 октомври (сабота). Вардарки во СЦ „Јане Сандански“ во првото коло од групната фаза во групата Ц, ќе го пречекаат квалификантот, најверојатно унгарскиот вицепрвак Ѓер, кој е прв фаворит за ова место.
Со оглед на тоа дека во моментов не се потврдени сите термини од групната фаза од ЕХФ, сè уште е непознат терминот за гостувањето кај Хипо, во второто коло, кое се игра во периодот од 23 до 25 октомври.
Во третото коло на 1 ноември (недела), вардарки играат одново на домашен терен, против добро познатиот противник, дански Митјиланд, меч закажан за 15.15 часот.
Во моментов непознат е терминот за четвртото коло (13 – 15 ноември), кога „црвено-црните“ дами треба да му гостуваат на квалификантот во Лигата на шампионите, како и за последниот викенд од групната фаза, 20 - 22 ноември, кога нашиот шампион треба да игра пред својата публика со Хипо. За дефинирање на овој термин, најверојатно се чека договор меѓу машкиот и женскиот тим на Вардар, со оглед на тоа дека момците истиот викенд во Скопје треба да го пречекаат актуелниот европски првак Барселона.
Новата сезона во Лигата на шампионите во женска конкуренција ќе стартува на 16 октомври со натпреварите меѓу Крим Меркатор и вториот квалификант во рамките од групата А, односно дуелот меѓу ЧСМ Букурешт и Љублин во групата Д.