Во пресрет на премиерното издание на „Вардар-турнир“ во женска конкуренција, кој стартува в сабота, македонскиот првак ЖРК Вардар и руски Ростов Дон вчера попладнето одиграа контролен дуел. Средбата заврши со победа на вардарки од 34:27, што е втора за тимот на Индира Кастратовиќ и на Јан Питлин над Русинките во изминатава седмица, со оглед на тоа дека двата тима претходно се сретнаа на „Букурешт-трофеј“, во битката за третото место.
Фактот дека е пријателска средба остави простор тренерите да се договорат натпреварот да се одигра трипати по 20. минути.
„Црвено-црните“ дами имаа одлично отворање на средбата со серија од четири гола, 4:0, а во истиот ритам продолжија, па така Черноиваненко, донесе дотогаш највисоки 11:5, а со 13:9 Вардар го затвори првиот дел.
Ваквата резултатска позиција им дозволи на Вардаровите тренери да комбинираат со составот и да им дадат шанса на сите ракометарки кои ги имаат на располагање. Ростов најмногу се доближи на два негатива (19:17), но благодарение на добрата одбрана и брзиот контранапад, Вардар направи нова серија и се „одлепи“ на 22:17.
Највисоката предност македонскиот првак ја имаше на почетокот на третиот дел од мечот, 29:20, што беше само најава за победата.
Сите Вардарки добија шанса за игра, со исклучок на Јованка Радичевиќ, која не се најде во составот и која и понатаму работи по посебна програма поради проблемите со ногата.
Дамјановиќ и Пенезиќ со по 6 погодоци беа најефикасни кај Вардар, Черноиваненко постигна 5, а Лекиќ 4 гола. Кај Ростов Манагалова и кај Пунко имаа по 5 погодоци.
Ростов Дон е еден од учесниците на „Варда-турнирот“, кој од 29 август до 1 септември ќе се одржува во СЦ „Јане Сандански“, но тие не се во иста група со македонскиот шампион.