Скопје, 11 октомври 2015 (МИА) - Левиот бек на Вардар, Александар Деревен на вчерашниот дуел со Рајн Некар доби повреда на задниот рог на менискусот и оток на предните вкрстени лигаменти на десното коло и поради тоа ќе биде надвор од теренот најмалку еден месец.
- Нашето летно засилување го очекува пауза од терените додека да се рехабилитира од повредата која ја заработи уште во првото полувреме од вчерашниот натпревар против Рајн-Некар. Во следните 10 до 15 дена Деревен ќе прави терапија за намалување на отокот, а потоа ќе му биде напревена нова магнетна резонанца за да се утврди дали има некое поголемо оштетување на предните вкрстени лигаменти. На Деревен му посакуваме што побрзо оздравување и враќање на терените, стои во информацијата од РК Вардар.
Деревен повредата ја заработи во почетните минути од натпреварот по што на носилки беше изнесен од салата во СЦ „Јане Сандански“ и пренесен во болница.
Вардар го победи Рајн Некар со 25:19 и со максимални четири победи е лидер во Б-групата од Лигата на шампионите.