Најдобриот стрелец на Металург во Лигата на шампионите, Јанко Божовиќ, по вторпат сезонава се најде меѓу најдобрите седум, овој пат по 4. коло од најсилното европско клупско натпреварување. И покрај несреќниот пораз на „металурзите“ на гостувањето кај Скјерн, Божовиќ блескаше со 11 погодоци, што го прави најдобриот десен бек викендов во ЛШ.
Божовиќ во идеалниот тим е во друштво на Андерс Егерт од Флензбург, кој е најдоброто лево крило, потоа Микел Хансен (ПСЖ), најдобар лев бек, како и Габор Чазар од Кадетен Шафхаузен, кој е најдобар организатор на играта за викендов.
Дарко Ѓукиќ, поранешниот играч на Металург, кој сезонава го носи дресот на Бешикташ, е најдоброто десно крило. Позицијата најдобар пикер му припадна на Алберт Кристеску од Баја Маре, додека најдобар голман е Никлас Ландин од Кил.
И покрај убедливата победа на Вардар над Рајн Некар Левен во Скопје, ниту еден од Вардаровите ракометари не се најде во идеалната постава на ЕХФ ТВ.