Чешкиот интернационалец и еден од најдобрите ракометари на денешницата, Филип Јиха, според официјално непотврдени информации ќе мора да ја санира повредата на карлицата со оперативен зафат и да мине надвор од теренот неколку, најверојатно четири месеци.
Ова е информација која вчера циркулираше низ интернетот, иако нема официјална потврда од чешкиот играч, а во претходното соопштение на каталонскиот клуб стоеше дека Јиха ќе мора на операција, а во наредниве денови, во зависност од тоа како ќе реагира на терапиите, ќе биде донесена одлуката кога ќе оди „под нож“. Шпекулациите се однесуваат на времето кое ќе мора да го мине надвор од теренот.
Така Барселона во Скопје ќе дојде без три ракометари со кои ја почна сезоната. Да потсетиме, прво Даниел Шариќ замина за Доха да ги брани боите на Катар во олимписките квалификации, по тоа се повреди и Даниел Сармиенто, а сега редот дојде и на големото засилување и замена за Никола Карабатиќ.
Дека им е сеедно, сигурно дека не е, но Барселона е голем клуб со широк ростер, а во меѓувреме во нивните редови се пресели и повремениот шпански репрезентативец Карлос Руесга. Доза плус на самодовербата им влеа и Ваел Жалуз со импресивната партија против Вардар минатиот викенд.
Во меѓувреме каталонците го градат тимскиот дух и низ фото сесии, а последната ги прикажува момците од „Блау грана“ премачкани со воинствени бои и во стајлинг препознатлив за антички воини.