Каква ќе биде иднината на македонскиот плејмејкер Наумче Мојсоски ќе биде познато, најверојатно, денеска. Наумче Мојсоски е во Букурешт каде што треба финално да се договори со управата на ЧСМ Букурешт за трансфер во клубот.
Мојсоски во Букурешт пристигна во неделата и веќе одработи два тренинга под водство на Звонко Шундовски, но финализирањето на договорот кое требаше да биде вчера, ќе биде предмет на разговор денеска.
Одлагањето е резултат на презафатеноста на ЧСМ, клуб кој ја води и женската екипа, а тоа е тим со големи амбиции и многу странци, тим кој сезонава би требало да го симне Баја Маре од тронот. Токму дуелот со Баја Маре беше синоќа на програмата во преполната „Поливалента“ во романската престолнина и сите активности и комплетниот фокус на управата на романскиот тим беа насочени кон тоа да се совлада Баја Маре.
Иако се големи шансите, сепак, не би се обложиле со се што имаме и на опцијата дека денеска се ќе биде решено и со Наумче Мојсоски. Но, најавите се дека така би требало да биде. ЧСМ е првиот вистински конкретен клуб во преговорите со македонскиот ас. Фактот што Мојсоски е во Романија е потврда, иако во еден момент и други опции беа исто така реални.