Европскиот првак Барселона на помалку од 24 часа пред реванш натпреварот закажан за в недела во „Јане Сандански“ со Вардар, ќе пристигне во Скопје. Каталонскиот гигант со чартер лет ќе допатува во македонската престолнина в сабота вечерта, околу 19:30 часот и нема најавен тренинг пред дуелот од 8. коло од групата Б од Лигата на шампионите. Тоа значи дека Кирил Лазаров и неговите соиграчи од авион ќе истрчаат на теренот во спортскиот центар.
Барселона доаѓа самоуверена во Скопје по победата минатата недела во „Блау Грана“, 31:30, со која застана и на врвот на табелата во групата.
Искуството вели дека ваквиот однос на Барселона, не е само во овој случај, туку дека европскиот првак и во минатото знаел да има ваква пракса, пред две сезони кога во Скопје му гостуваше на Металург.
ПРЕС НА ПЛАДНЕ
„Црвено-црните“, пак, денеска, на пладне, согласно процедурата на ЕХФ ќе одржат средба со медиумите на кои ќе бидат презентирани размислувањата и очекувањата во пресрет на реваншот со Барселона.
Натпреварот Вардар – Барселона е закажан за в недела (17:45 часот) во „Јане Сандански“, кој несомнено е дека ќе биде (пре)полн со оглед на фактот дека билетите за мечот беа распродадени уште пред три седмици, непосредно откако беа пуштени во продажба.