Организаторот на играта на Вардар, Игор Карачиќ, нема да патува за Киелце, каде утре „црвено-црните“ одново ќе ги измерат силите со полскиот првак во групната фаза од Лигата на шампионите. Средниот бек заработил повреда на левото колено на натпреварот против Барселона во Скопје и ќе одмора до понеделник. Карачиќ не тренираше ни на вчерашниот последен тренинг на екипата пред заминувањето за Полска.
„Игор има болки во коленото и во консултации со стручниот штаб одлучивме да не патува за Киелце. Ќе мирува и ќе подлежи на терапии, па од понеделник ќе видиме каква ќе биде состојбата со коленото и дали ќе може да се приклучи на тренинзите“, информираат од Вардаровиот табор.
Отсуството на Карачиќ ќе значи дека Раул Гонзалез за дуелот со Киелце ќе располага со само еден плејмејкер, Лука Циндриќ.
Покрај средниот бек, во Полска нема да патува ниту Петар Ангелов, кој во ротацијата на голманите е оној кој останува во Скопје.
Вардарци рано изутринава (7:30 часот) заминаа за Киелце, каде попладнево ќе го одработат единствениот тренинг пред утрешниот натпревар со полскиот шампион.
ГОНЗАЛЕЗ: ИМАМЕ ШАНСИ
Првиот од трите директни ривали за второто место во групата Б во ЛШ е добро познат за Вардаровиот табор. Киелце веќе загуби во Скопје, убедливо, со десет гола разлика, но за да биде таа пречка елиминирана потребно е „црвено-црните“ момци да слават и на гостински терен. По двата порази од Барселона, на тимот му е неопходно да се врати на победнички патеки, но јасно е дека ќе биде пеколно тешко на полски терен. Сепак, шанси секогаш има.
-Против Киелце дома одигравме одлично, можеби најдобриот натпревар во Лигата на шампионите сезонава. А, игравме одлично и на претходните два натпревари со Барселона, цели 55 минути, но кога беше најпотребно како да не знаевме како да завршиме, направивме премногу грешки. Затоа не можам да кажам дека е потребно да се репризира таквата игра. Секој натпревар е приказна за себе и сите знаат дека јас и Талант имаме сличен систем на игра. Затоа се подготвуваме на сè, се поставуваат тактички замисли, но никогаш не знаеш како ќе биде на терен. Играме на гостински терен, со силен, незгоден противник. Имаме шанса, но потребно е одново да го прикажеме она ниво кое го имавме против Киелце во Скопје – заклучува тренерот на Вардар, Раул Гонзалез.