Туристичката агенција „Пилот травел“, која е партнер на РФМ во организацијата на македонските навивачи за Европското првенство што ќе се одржи во Полска, го отвори пакетот на понуди за „фалангата“.
Со оглед на тоа дека онлајн билети немаше по 2 минути од пуштањето во продажба, заинтересираните за пат во Краков ќе мораат да се снаоѓаат по свои канали или преку туристичка агенција. РФМ има право да закупи, односно резервира одреден број билети од организаторот на првенството, но нема право да ги (пре)продава, па целата авантура паѓа врз туристичката агенција.
Споменатата агенција има закупено само 100 билети од Категорија 3 кои се врзани со сместување. Цените на аранжманот се движат од 23.000 денари до 29.000 денари во зависност од хотелот. Вклучен е автобуски превоз, шест ноќевања со појадок, билети за првата фаза вклучително и отворањето на првенството и туристичко разгледување на Краков.
Засега немаме информација дали и други агенции имаат свој план за организирање на патување на ЕП.
Така очекуваме „фалангата“ во Краков да биде максимум 200 луѓе, што и не е мала бројка имајќи предви повеќе фактори.