Долго време се зборуваше и шпекулираше дека хрватското десно крило Иван Чупиќ преговара со Вардар. На првиот медија ден по пристигнувањето на Хрватите во Краков и самиот потврди дека може да се види во „црвено-црно“, но дека прво ќе разговара со неговиот клуб Киелце. Сега доаѓа потврда и од Киелце дека тој заминува од клубот.
Ова значи дека само денови, можеби часови нè делат од официјалната презентација на хрватското крило Иван Чупиќ во Вардар.
„Ние ќе ја почитуваме секоја одлука на нашите ракометари“, изјави во интервју за полски медиуми Бертус Сервас, сопственикот на Киелце.
Ваквата промена на неговиот став се должи и на одличните настапи на Тобијас Рајхман за репрезентацијата на Германија на ЕП. Тој досега во Киелце ја имаше улогата на замена за Чупиќ, но отсега сосема сигурно ќе биде прв избор на Душебаев.
Чупиќ во Скопје би ја пополнил празнината која ќе остане по заминувањето на Матјаж Брумен. Тој следната сезона ќе игра за екипата на Горење.