Управниот одбор на состанокот кој претходеше на Собранието на клубовите, донесе одлука за распишување на конкурс за селектор на машката сениорска репрезентација на Македонија. На оваа одлука претходеше разрешување на селекторот Ивица Обрван. Малку подоцна и претседателот на РФМ, Живко Мукаетов, најави дека на репрезентацијата, по дебаклот во Гдањск и е потребно итно и радикално подмладување.
ПРВИОТ ФАВОРИТ Е ...
Мораме да бидеме реални и да признаеме дека е неблагодарно да се даваат прогнози и прогласуваат фаворити додека трае конкурсот, но нема никого да изненадиме доколку кажеме дека првиот фаворит за селекторската позиција во моментов е хрватскиот стратег Лино Червар.
Негов најсилен адут не е само стручноста, туку и моментот што под свое ги има „џокерите“ во вид на Талески, Кузмановски, Нелоски, Велковски и така натаму, а РФМ бара четиригодишна стратегија и радикално подмладување.
Да не бидеме погрешно разбрани, целта не е да го промовираме или фаворизираме Червар, посебно доколку добие конкуренција од други врвни кандидати. Конкурсот е отворен и секој што ги исполнува условите има полно право да се бори за испразнетата позиција.
БЕЗ ПОТВРДА
Тоа што нема класичен демант како во безброј случаи кога бил „селен“ во нова средина е можеби најцврстиот доказ во моментов дека Червар е (нај)сериозен кандидат за селекторската позиција. Се обидовме и да го „фатиме на спиење“ и можеби да извлечеме некое „да“ или „не“, но не се даде старата лисица и единственото што слушнавме како одоговор на прашањата дали ќе се кандидира или дали е во преговори и така натаму беше - „Ќе видиме, ќе видиме“.
ДЕСЕТ ДЕНА ЗА ПРИЈАВИ
Конкурсот ќе трае десет работни дена, што значи дека пријавите ќе се отворат, имајќи ги предвид и празниците, на 10 мај. Иако неспорно е дека на сите им се брза со назначувањето на селектор поради близината на квалификациите за СП, овој период нема да биде доволно долг за кандидатите кои би се пријавиле колку да си ја пробаат среќата. Имало, можеби и сега ќе има и егзибиционисти како српскиот стратег Ристо Буха на пример, кој аплицира на еден претохден конкурс.
Ова го велиме од причина што е потребен 4-годишен план за работа како еден од условите за апликацијата да биде прифатена. А да се подготви таков план и сето тоа да изгледа сериозно и привлечно за РФМ, нема да биде едноставна работа која се подготвува преку ноќ.