Вардар во Веспрем го одработи единствениот тренинг пред утрешниот реванш во четвртфиналето на Лигата на шампионите.
По пауза од еден месец во таборот на Вардар за дуелот со Веспрем се враќа капитенот, Филип Лазаров.
Она што е познато е дека Вардар го чека тешка задача, треба да ја анулира предноста на Веспрем од 29-26 по првиот натпревар. Лазаров вината ја посочува во пропуштените зицери и смета ако таквите ситуации се користат во Веспрем, Вардар може да направи големо изненадување.
„Пропуштивме многу зицери, а и голманите имаа слаб ден. Ако се сменат тие две три работи сигурно дека имаме шанси. Тежок резултат е негатива од три гола, особено против Веспрем, знаеме кој е и што е, но сигурно дека имаме шанси. Нема да одиме и да се предадеме, всушност размислував деновиве и сфатив дека оваа сезона имавме добри гостувања, па нека биде така и сега. Одиме да се надигруваме, ние всушност и во Скопје не одигравме лошо, туку малку немавме среќа, оваа разлика е нереална, со тие детали што ги спомнав, како зицерите, голманите, дури според мене можевме да имаме и подобро судење како домаќин. Се надевам дека ќе се сменат тие неколку работи и ќе бидеме во игра“, рече Лазаров.
Натпреварот се игра утре во 17.30 часот.