Ренато Вугринец одново е слободен играч. Поранешниот ракометар на Металург и на македонската репрезентација го одработе договорот со изралескиот тим Макаби Ришон од Тел Авив и сега одново е слободен агент.
„Слободен играч сум, одново сум на ракометниот маркет“, вели Вугринец, кој од Израел заминува за Словенија, а по тоа ќе видиме каде ќе го однесе патот, затоа што иако има полни 41 година нема намера да ја заврши кариерата. Во меѓувреме Ренато Вугринец се суди со Металург околу неисплатените плати и раскинатиот договор од пред една и пол година.
Вугринец во Металург дојде во 2012 во последните моменти од преодниот рок, но многу брзо се вклопи во новата средина и за рекордно време ги освои срцата на македонските ракометни фанови, посебно на тие кои навиваат за Металург и на припадничките на понежниот пол.
Во дресот на Металург во 2013 година стана и втор стрелец во Лигата на шампионите со 95 гола, зад Момир Илиќ кој постигна 103, но српскиот бек имаше и два натпревара повеќе со оглед на тоа дека Веспрем и одигра два натпревара повеќе од Металург таа сезона.
Есента 2014 почна распадот на Металург, а Вугринец беше еден од ракометарите кои останаа до последен момент да ги бранат боите на клубот, но по мундијалот во Катар и тој како и речиси сите други си замина. Негова дестинација беше Израел каде што остана до крајот на сезоната.