Машката одбојката репрезентација на Македонија денеска претпладне ќе го одржи својот последен тренинг во Скопје, а вечерва заминува за бугарскиот град Варна каде в петок го почнува настапот на финалниот турнир во Европската лига.
„Задоволство ми е што сум селектор на тим кој трета година во низа е дел од завршницата во Европската лига. Тоа е резултат за почит. Малкумина очекуваа од нас дека повторно ќе се вратиме во Варна, но покажавме дека имаме искуство и квалитет за достојно да ја претставиме македонската одбојка. На фајнал-форите нема фаворити и аутсајдери, сите сме со изедначени шанси, но очекувам добра игра и пласман во финалето. Оваа генерација заслужува ново финале“ - вели селекторот Жарко Ристоски.
Македонија на убедлив начин го освои првото место во првата фаза, и тоа ни донесе полуфинале со Австрија, која е полесен противник на хартија од Естонија.
Мечевите на Македонија во Варна ќе ги пренсува телевизија Алфа. Дуелот со Австријците се игра в петок со почеток во 14 часот по македонско време. Во составот на Ристоски ќе го нема Јовица Симовски кој играше на скопскиот турнир.