Швајцарецот Роџер Федерер нема да учествува на Олимписките игри во Рио и нема да игра тенис до крајот на 2016 година затоа што му е потребно време да ја залечи повредата на коленото. „Федекс“ преку писмо им ја соопшти веста на своите фанови.
„По консултација со лекарите и мојот тим, морав да донесам многу тешка одлука, а тоа е да ја завршам сезоната затоа што ми е потребна сериозна рехабилитација од операцијата на коленото која ја имав на почетокот на годината. Докторите ми кажаа дека доколку сакам без проблеми да играм уште неколку сезони, што е и моја желба, морам да одмарам и да му дозволам на коленото добро да заздрави“, вели Федерер во писмото.
„Тешко ми паѓа тоа што ќе ги пропуштам сите турнири до крајот на годината. Но љубовта кон тенисот, турнирите и секако кон навивачите не се променила, јас сум мотивиран како и секогаш и морам да одам на подолга пауза за во 2017 година да бидам здрав и во форма“, соопшти Швајцарецот кој освои златен медал во двојки на ОИ во Пекинг.