Рафаел Надал се подготвува за настап на УС опен без гренд слем титула во повеќе од две години и поранешниот британски број 1, Грег Руседски, смета дека славните денови на 30-годишниот тенисер се минато и дека нема да може да додаде нов гренд слем на 14-те освоени.
„Не гледам како Рафа би можел да освои нова гренд слем титула. Тој е голем шампион, но во моментов не гледам дека тоа е можно“, изјави Руседски, кој сега работи како соработник на спортската мрежа „Евроспорт“.
Сезоната 2016 година беше за заборав за Надал откако мораше да се повлече од Ролан Гарос, неговиот омилен турнир поради повреда на зглобот на раката, по што го пропушти Вимблдон, пред да се врати на Олимпијадата во Рио. Таму тој ја освои титулата во двојки со Марк Лопез, но загуби во мечот за бронзен медал од Јапонецот Кеи Нишикори.
„Целата 2016 за Рафа беше околу Ролан Гарос и тој повторно се повреди. Во Синсинати загуби од Борна Чориќ и не изгледа најздраво. Ако може да ги надмине проблемите со зглобот на раката, може да дојде до четврт-финалето, но не гледам како би можел да оди до крај и не би бил изненаден од ран пораз“, вели Руседски.
Англичанецот, кој стигна до финалето во Њујорк во 1997 година и загуби од Пет Рафтер, вели дека дури и Надал да биде 100% здрав, ќе му биде многу тешко во новата ера.
„Енди Мареј и Новак Ѓоковиќ навистина се одвоија оваа година. Тие играа во финалињата во Австралија и Ролан Гарос и покажаа дека се во најдобра форма. Мислам дека и тука ќе го покажат својот авторитет“, вели Руседски.