Серена Вилијамс вели дека и е доста да игра со повреди. 22-кратната гренд слем шампионка го загуби првото место на ВТА листата од Германката Анџелике Кербер откако загуби во полуфиналето на УС опен, во сезона во која имаше проблеми со повредите на рамото и на коленото.
Американката, која ќе наполни 35 години следната недела, сега не сака да поставува датум за нејзиниот кам-бек, велејќи дека прво сака да е сигурна дека е физички подготвена.
„Доста ми е од играње на турнири со повреди и губење на мечеви кои обично не би ги загубила. Сакам да се осигурам дека сум здрава и дека играм на барем 80 или 70 отсто. Така ќе можам да сум на највисокото ниво“, изјави Вилијамс при отворањето на новата тениска академија на нејзиниот тренер, Французинот Патрик Муратоглу во Ница.
Повредата на коленото ѝ пречеше на Вилијамс во шокантниот пораз од Чехинката Каролина Плишкова на Флешинг Медоуз, иако таа одби да ја префрли вината на повредата. Таа има само една гренд слем титула оваа година (Вимблдон) во споредба со три во 2015. Таа има закажано уште три турнири во 2016 - два во Кина и завршниот ВТА шампионат во Сингапур на 24 октомври.
„Да бидеме искрени, ова беше лоша сезона за Серена. Имаше многу повреди и не можеше да игра многу, на само осум турнири. Затоа секој турнир без титула е лош резултат за неа“, изјави Муратоглу.