Лина Ѓорческа одличниот настап кој го има оваа недела на фјучр турнирот во Сент Мало денеска има шанса да го потврди со титула. Македонскиот рекет број еден, заедно со Дијана Марчинкевица од Летонија ќе играат во финалето во конкуренција на двојки, а од спротивната страна на мрежата ќе го имаат романскиот пар Александра Каданту и Џакелин Адин Кристијан.
Откако во полуфиналето успеаја да го минат првиот носителски пар Томбаре/Заневска, Лина и Дијана важат за подоброрангиран дубл, отколку нивните опоненти. Доколку успеат да дојдат до титулата во Сент Мало, покрај солидниот паричен стимул, бидејќи ова е турнир кој влегува во категоријата од 50.000 американски долари, Ѓорческа ќе додаде нови 100 ВТА поени во конкуренција на двојки.
Со новите драгоцени бодови, Македонката ќе има рапиден напредок на ВТА листата, но на ранкингот кој ќе биде објавен идниот понеделник.