Настапите на националните тимови полека се ставаат во втор план, а на големата сцена се враќаат натпреварите од Лигата на шампионите во машка конкуренција. Во фокусот е токму Вардар и неговото соочување со актуелниот европски првак, Киелце, во мечот на неделата на ЕХФ.
Редуцираниот тим со кој деновиве располагаше Раул Гонзалез полека почнува да се консолидира, а комплетниот играчки кадар стратегот ќе го има на располагање в среда претпладне. Со оглед на тежината на натпреварот кој го очекува Вардар, Гонзалез разбирливо одлучи да им даде ден-два одмор на играчите со репрезентативен статус, за свежи да се појават во средината на неделава.
Добри вести доаѓаат од црвено-црниот табор дека сите играчи се на располагање и нема никакви здравствени проблеми. Искусниот голман Арпад Штербик, кој имаше хематом на рамото, исто така е фит и подготвен за дуелот со европскиот шампион.
Киелце и Вардар во досегашниот тек на групната фаза од Лигата на шампионите се на лидерската позиција во групата Б, со ист број на победи (по четири) и еден пораз, како и ист број бодови.