Македонската женска ракометна репрезентација стигна до прва победа од 2013 година, откако на стартот на квалификацискиот турнир за СП 2017 со тешки 21:19 беа подобри од Фарските Острови.
Женскиот тим на Македонија, конечно, почувствува што значи победа на официјален натпревар. Малку од овие играчи имале такво чувство со оглед на тоа дека четири и пол години губевме. Противник ни беа Фарски Острови, а Македонија мечот го доби со тесни 21:19 (8:8). Не е ова резултат ниту игра за фалење, но барем победивме.
Македонија отвори подобро и поведе со 3:1 по шест минути игра, но по тоа силите на теренот се израмнија. Ф. Острови покажаа дека во моментов се ранг на Македонија... или дека Македонија е нивни ранг, како сакате. Израмнија на 3:3, но останаа со играч помалку домашните, па Македонија благодарение на единствениот период во првото полувреме во кое играа агресивна одбрана поведе со 6:3.
Македонија го одржуваше водството, поведе со 7:6 во 20. минута, а првото израмнување беше во 23 минута (7:7). Минута подоцна Ф. Острови поведоа со 8:7, Македонија израмни на пет минути до крајот на полувремето и од тој момент до звукот на сирената мрежите мируваа.
Се одиграа цели десет минути од продолжението кога Македонија стигна до клучната предност. Повеќе благодарение на лошата игра на противникот, отколку доба на девојките во црвено.
Ф. Острови, сепак, не се Данска или Норвешка, па фрлија две топки „во публика“, а Македонија тоа го искористи за да поведе со 16:13 во 45. минута.
Дамите, викендов ги чека пеколна задача со оглед на тоа дека играат со фаворитите за првите две места во групата три. Утре играат со Австрија, додека во недела противник е Исланд.