Борис Бекер веќе не е тренер на Новак Ѓоковиќ, но целосно верува дека српскиот светски тенисер број 2 ќе го врати своето „најдобро ниво“ и ќе освојува гренд слемови во 2017 година. 29-годишниот Ѓоковиќ последната титула ја освои во август и покрај блескавиот старт на сезоната, по што го загуби и првото место на АТП-листата од Енди Мареј. Причина за падот беше „заситување“ од тенисот, но и личните проблеми.
„Нема причина зошто Новак не би можел повторно да го врати интензитетот на игра. Тој играше добро на АТП-финалето, и и покрај поразот не заборавил да игра. Од тоа што го слушнав, тој ги зголеми своите тренинг-сесии и не е далеку од врвот“, вели Бекер, кој престана да работи со Ѓоковиќ по три години заедно.