Најдобрата македонска тенисерка, Лина Ѓорческа, ја оствари својата прва гренд слем победа во кариерата. Лина во квалификациите на Австралискиот опен, во првото коло ја победи американската тенисерка Саша Викери со 6:2, 3:6, 6:3.
„Имав одличен меч против тенисерка којашто е навистина квалитетна. Среќна сум за мојата гренд слем победа во кариерата и се надевам дека е една од многуте. Сепак, нема време за големо славење бидејќи ме очекува нов тежок меч во период од 24 часови. Нема да биде лесно, но, јас нема да се откажам“, изјави Лина.
Ѓорческа имаше фантастичен меч против Викери, а како доказ за тоа е и податокот каде што се вели дека има сервирано 11 сервис асови.
Сепак, како што истакна и Лина, време за славењ речиси нема. Веќе утрово, поточно во 3 часот закажан е дуелот од второто коло против Далма Галфи. Унгарката во моментов се наоѓа на 162. место на ВТА листата.