Јамајканскиот атлетичар Усеин Болт е скршен поради тоа што остана без еден од своите девет олимписки медали. Болт остана без златото од штафетната трка 4х100 на Олимписките игри во Пекинг, меѓутоа не по негова вина туку по вина на неговиот колега Неста Картер, за кого е утврдено дека бил позитивен во повторната анализа на примероците од урина и крв. Освен Болт, без медалите останаа и другите членови на штафетата Асафа Пауел и Мајкл Фрејтер.
„Срцето ми плаче. Со години напорно работев да бидам првак и да освојувам златни медали. Многу сум разочаран, но, за жал, вакви работи се случуваат во животот. Морам да ја прифатам одлуката. Ми рекоа да го вратам златниот медал и ќе го направам тоа“, изјави Болт.
Олимпискиот комитет на Јамајка најави жалба на одлуката на МОК, меѓутоа мали се шансите да успеат да ги вратат медалите на триото атлетичари. И правниот тим на Картер исто така ќе се обиде да ја оспори одлуката на МОК.
Според новиот поредок, златото замина кај штафетата на Тринидад и Тобаго, среброто кај Јапонците, а бронзата кај Бразилците.