Од минатата недела беше познато дека белорускиот претставник во СЕХА Газпром лигата, БГК Мешков и градот Брест ќе бидат домаќини на СЕХА Ф4 турнирот, но вчера тие ја имаа и официјалната промоција. Брест ќе го пречека најдоброто од регионалното натпреварување викендот од 7 до 9 април, каде покрај домашниот претставник уште ќе ги гледаме и македонскиот првак Вардар, двократниот бранител на титулата Веспрем, како и хрватскиот шампион ППД Загреб.
БГК Мешков со исклучок на првата сезона, во сите останати е редовен учесник во завршницата, а сега се надева дека на домашен терен ќе може да ги израдува фановите и со пехар.
„Огромна чест за нас е организацијата на Ф4. Тоа ќе биде голем празник за нашиот град и фановите. Ќе се обидеме да ја организираме завршницата на највисоко ниво. Постојани учесници сме на финалните турнири, но никогаш досега не сме успеале да го кренеме пехарот. Се надевам дека тоа ќе го сториме пред домашна публика“, изјави спортскиот директор на БГК Мешков, Павел Башкин, при официјалното претставување на градот домаќин.
Полуфиналните натпревари во кои ќе се соочат Вардар и ППД Загреб, односно БГК Мешков и Веспрем се закажани за петок (7 април), додека мечот за третото место и финалето се играат во недела (9 април).