По еднонеделна пауза македонскиот првак ЖРК Вардар од денеска се собира во својата база СЦ „Јане Сандански“ каде започнуваат подготовките за мисијата „Митјиланд“, односно за четвртфиналето со данскиот првак во Лигата на шампионите. До последниот филтер пред Ф4 во Будимпешта во најсилното европско клупско натпреварување „црвено-црните“ ги очекуваат три недели во кои на агендата имаат два ВРХЛ турнир во кои ќе одиграат четири силни натпревари. Сè во следниов период ќе биде ставено во функција за што подобро темпирање на формата за дуелите со Митјиланд, преку кои вардарки ќе се борат за четвртото во низа учество на „фајнал-форот“, а од таму и за европската круна.
„Денеска одново се собираме и започнуваме со подготовки за четвртфиналето со Митјиланд. Имаме доволно време, каде во прилог ни одат и двата турнири во ВРХЛ, па ќе имаме и доволно пријателски натпревари за темпирање на формата. Веќе работиме и на анализи на Митјиланд, на нивната игра и на тоа како да најдеме најдобар одговор на теренот. Нè чека работа, но мобилизирани сме и подготвени ќе го дочекаме предизвикот“, вели новиот стратег на Вардар, Ирина Дибирова.
Вардарки во Скопје ќе одработат три тренинзи пред да заминат за Копривница, каде викендов ќе се одигра вториот регионален турнир, а во кој за противници ги имаат домаќинот Подравка и големиот ривал Будуќност, уште еден патник во четвртфиналето од ЛШ.